Tilþrif vikunnar: K-DOT klárar lotuna fyrir Fylki og Clvr „clutchmaster“

Líkt og áður eru tilþrif vikunnar í boði Elko, en fyrra myndbrotið sem við sjáum er af K-DOT í viðureign Fylkis og Ármanns síðastliðinn þriðjudag. Það voru liðsmenn Ármanns sem fóru með sigur af hólmi 16-13, en þrátt fyrir það átti K-DOT, leikmaður Fylkis, tilþrif kvöldsins.

Viðureignin fór fram á kortinu de_nuke og þegar Fylkismenn voru undir, 14-9, kláraði K-DOT lotuna með því að taka fjóra af fimm meðlimum Ármanns út.

Síðara myndbrotið sem við sjáum er af Clvr í viðureign Dusty og Þórs á kortinu de_mirage. Dusty og Þór sitja í fyrsta og öðru sæti deildarinnar, en Dusty hafði nú þegar tryggt sér deildarmeistaratitilinn fyrir viðureignina.

Það var þó ekki að sjá að liðsmenn Dusty væru orðnir saddir því þeir unnu viðureignina örugglega, 16-6, og Clvr átti bestu tilþrif kvöldsins þegar hann kom Dusty í 3-1 þegar hann var einn á móti tveimur eftir. Tómas Jóhannsson lýsti atburðarásinni og var vægast sagt spenntur yfir því sem hann sá á skjánum hjá sér.