Brutu lög með aug­lýsingu um „allt að 40% ó­dýrara“ á­fengi

Þetta er niðurstaða Neytendastofu sem hefur bannað fyrirtækinu að viðhafa slíka viðskiptahætti og auglýsingarnar sagðar villandi.

Fram kemur að Neytendastofu hafi borist ábendingar um að á vefsíðu Nýju vínbúðarinnar væri fullyrt að vörur félagsins væru „allt að 40% ódýrari“. Ekki væri þó tekið fram um við hvað væri átt.

Yfirstrikað verð

Neytendastofa hafi þá óskað eftir upplýsingum um framsetningu verðs á vefsíðu Nýju vínbúðarinnar en þar sem iðulega væri birt yfirstrikað verð og svo lægra verð þar við hliðina á. Því hafi mátt ætla að verið væri að selja vörur á lækkuðu verði.

Ennfremur hafi Neytendastofa gert athugasemdir við að vörur hefðu verið auglýstar í takmörkuðu magni án þess að tilgreint hefði verið nákvæmlega hvaða vörur væru boðnar til sölu í takmörkuðu magni eða hversu mikið af vörunni eða vörunum hafi verið í boði.

Verið að bera saman við verð í Vínbúðinni

Í svörum Nýju vínbúðarinnar kom fram að yfirstrikað verð á heimasíðu hennar væri verð í Vínbúðum ÁTVR og því væri verið að bera saman verð Nýju vínbúðarinnar við verð í verslunum ÁTVR, eina samkeppnisaðila félagsins á þeim tíma. 

Vildi Nýja vínbúðin meina að vísun í „allt að 40% ódýrari“ væri því ekki vísun í afslátt heldur væri þetta verð í verslunum ÁTVR borið saman við verð í vefverslun félagsins. Þegar kemur að takmörkuðu magni þá hafi það fyrst og fremst verið sett fram um ýmsar vörur sem framleiddar séu í takmörkuðu upplagi.

„Í ákvörðun Neytendastofu kom fram að framsetning verðupplýsinga á vefsíðu Nýju Vínbúðarinnar væri til þess fallin að telja neytendum trú um að þeir væru að kaupa vörur á lægra verði en þær hafi áður verið seldar á hjá Nýju Vínbúðinni. Með framsetningu verðupplýsinga og með því að tilgreina ekki hvað sé átt við með fullyrðingunni „allt að 40% ódýrara“ hafi rekstraraðili Nýju Vínbúðarinnar veitt villandi upplýsingar um verð og annað verðhagræði auk þess sem ekki voru færðar sönnur á fullyrðinguna. Þá hafi rekstraraðili Nýju Vínbúðarinnar brotið gegn ákvæðum laga með því að auglýsa takmarkað magn, án þess að tiltaka hvaða vörur sé um að ræða eða hve mikið magn sé í boði.

Bannaði Neytendastofa rekstraraðila Nýju Vínbúðarinnar að viðhafa ofangreinda viðskiptahætti,“ segir á vef Neytendastofu.