Bensínlítrinn undir 290 krónur í fyrsta sinn síðan í maí

Atli Ísleifsson skrifar 10. mars 2023 12:39

Frá bensínstöð Costco í Garðabæ þar sem eldsneyti er einungis selt meðlimum. Vísir/Vilhelm

Söluverð á bensínlítranum hjá Costco, þar sem lægsta verð hefur verið í boði, er kominn undir 290 krónur í fyrsta sinn síðan í maí síðastliðinn.

Í tilkynningu frá Costco segir að lítraverð á venjulegu blýlausu bensíni sé nú 289,7 krónur fyrir meðlimi Costco. Á sama tíma er lítraverð á dísil komið undir 300 krónur og er nú 299,7 krónur.

Á vef Gasvaktarinnar, þar sem fylgst er með þróun eldsneytisverðs, má sjá að eldsneytisverð tók að hækka mikið um mitt ár 2021. Eldsneytisverð náði svo hámarki í júní í fyrra á síðasta ári þegar lítraverð á bensíni fór víða yfir 350 krónur. Hjá Costco fór verðið hæst í tæpar 320 krónur.

Verðið tók svo að lækka í vetur og er nú komið undir 290 krónur í fyrsta sinn síðan í maí á síðasta ári.

Lítraverð á bensíni hjá völdum stöðvum Orkunnar, ÓB og Atlantsolíu er nú tæpar 302 krónur og lítraverð á dísil tæpar 313 krónur.

Bensín og olía Neytendur Costco

Tengdar fréttir

350 króna múrinn fallinn

Bensínlítrinn er nú víða kominn yfir 350 krónur í kjölfar umtalsverðra hækkana seinustu misseri. Samkvæmt gögnum frá Gasvaktinni reið Orkan á vaðið á mánudag og hækkaði verð á flestum stöðvum sínum um 11,5 krónur úr 343,4 krónum í 354,9 krónur á lítrann.

15. júní 2022 17:24