Segja íslensku olíufélögin hafa gert þegjandi samráð um að lækka ekki verð

Þetta kemur fram í fréttatilkynningu sem FÍB sendi út í dag vegna ummæla Þórðar Guðjónssonar, forstjóra Skeljungs, um bensínverð á Íslandi.

Þar segist FÍB undrast hvernig Þórður Guðjónsson, forstjóri Skeljungs, reyni að afvegaleiða umræðu um óeðlilega hátt bensínverð hérlendis með þeim ummælum að hér á landi séu ekki reknar olíuhreinsistöðvar og því sé ekki rétt að miða útsöluverð á eldsneyti við verðsveiflur á heimsmarkaðsverði hráolíu. Hann hafi haldið þessu fram í viðtali við RÚV þann 10. apríl síðastliðinn.

Þessi ummæli eru í tilkynningunni sögð „með ólíkindum“  og að forstjóri Skeljungs ætti að vita, í ljósi þess hvar hann starfar, að sala eldsneytis miðist á hverjum tíma við „heimsmarkaðsverð á unninni olíu (bensín, dísilolía) sem sveiflast í samræmi við heimsmarkaðsverð á hráolíu.“ Þar skipti staðsetning olíuhreinsistöðva engu máli.

Forstjóri Skeljungs svari fyrir öll olíufélögin

Þá segir í tilkynningunni að það sé í meira lagi sérkennilegt að forstjóri Skeljungs kjósi að svara fyrir öll olíufélög hér á landi þegar hann hafnar því að „félögin haldi verði óeðlilega háu.“ 

Íslensku olíufélögin kaupi öll eldsneyti frá sama framleiðanda, norska ríkisolíufélaginu Equinor. Flestir smásöluaðilar á eldsneyti á Norðurlöndunum vinni með sama hætti og íslensku olíufélögin, kaupi í heildsölu af birgja og selji aftur til neytenda.

„Stundum er aukið birgðahald og dreifing á höndum smásöluaðila en oft er því öllu útvistað,“ segir í tilkynningunni og er eldsneytissala Costco á Íslandi tekið sem dæmi um þetta. Hún sé í viðskiptasambandi við Skeljung um eldsneyti og birgðadreifingu að stöð félagsins í Garðabæ. Þar bjóði Costco sínum viðskiptavinum upp á þrettán krónu lægra lítraverð á bensíni en ódýrustu stöðvar Orkunnar sem Skeljungur rekur.

„Ef Equinor byði ekki samkeppnishæft verð þá færu félög á íslenska olíumarkaðnum með sín viðskipti annað. Hvers vegna forstjóri Skeljungs reynir að halda öðru fram vekur undrun,“ stendur í tilkynningunni. Meðfylgjandi tilkynningunni er línurit (sjá fyrir ofan) sem sýnir þróun bensínverðs á Íslandi og í Danmörku í samanburði við heimsmarkaðsverð á Norður-Evrópumarkaði á bensíni.

Ummæli forstjórans breyti engu um niðurstöðu FÍB

Forstjóri Skeljungs sagði í viðtali við Rúv að olíufélögin héldu eldsneytisverði ekki óeðlilega háu og að hagnaður olíufélaganna á Íslandi hafi minnkað. Þessar yfirlýsingar eru dregnar í efa í tilkynningunni og að þegar framlegð Skeljungs sé skoðuð sjáist að hún sé „í krónutölu jafn há núna og fyrir heimsfaraldurinn, en þá kostaði lítrinn nær 200 krónum meðan hann kostar núna yfir 300 krónur.“

Að lokum segir að ummæli forstjóra Skeljungs breyti engu um þá niðurstöðu FÍB að „íslensku olíufélögin hafi með sér þegjandi samráð um að lækka ekki útsöluverð á bensíni og dísilolíu þrátt fyrir lækkandi verð eldsneytis á heimsmarkaði.“ 

Samanburðurinn við Danmörku sé sláandi, þar fylgi útsöluverðið heimsmarkaðsverðinu en hér hafi útsöluverðið haldist óbreyt mörgum mánuðum eftir að heimsmarkaðsverðið fór að lækka til muna.