Fimm laxveiðiár komnar yfir 1.000 laxa

Það er augljós bati á veiðinni en það er alveg orðið ljóst að sumrinu verður sem slíku ekkert bjargað frá því að vera frá undir meðallagi víða í lélegt. Undantekning er vissulega með Hofsá, Selá og kannski Haffjarðará en aðrar ár eru ekki að skila þeirri veiði sem væntingar stóðu til miðað við góða opnun í mörgum ánum í byrjun sumars.

Ytri Rangá er ennþá efst á listanum með 2.571 lax, Eystri Rangá er með 1.874 laxa en hún hefur verið ansi erfið í sumar því hún hefur verið lituð í ansi marga daga fyrst sökum hita og svo úrhellis. Þverá - Kjarrá er komin í 1.169 laxa og situr þar með í þriðja sætinu. Það er aftur á móti erfitt að horfa á veiðitölur úr mörgum af nafntoguðustu ánum en þær endurspegla ekki alltaf stöðuna í ánni. Margar af þessum ám sem voru í fjórar til fimm vikur í litlu vatni gáfu augljóslega lélega veiði á þessum tíma þrátt fyrir að það væri mikið af laxi í þeim og þar má nefna Laxá í Kjós sem dæmi.  Veiðisumrinu líkur í hafbeitaránum í lok október en í lok september í náttúrulegu ánum svo það á eftir að bætast við veiðitölur en því miður verður það líklega ekkert sem lyftir þessu sumri úr status "vel undir meðal sumri". Listinn í heild sinni er á www.angling.is