Þrá­staða veðra­kerfanna brotnar upp í dag

Áfram verður hlýtt í veðri miðað við árstíma, núll til fimm stiga hiti, en á Austurlandi hangir þurrt fram á nótt.

Í hugleiðingum veðurfræðings segir að síðustu fjóra daga hafi veður á landinu verið tilbreytingarlítið með stífri og hlýrri suðlægri átt með vætu sunnan- og vestanlands, en þurru á Norður- og Austurlandi.

„Þessari einsleitni í veldur kyrrstaða í veðrakerfum við landið. Hæð hefur setið sem fastast við Skotland. Lægðir hafa verið á sveimi suður af Hvarfi (suðurodda Grænlands), en hafa ekki komist nær okkur vegna þess hversu vel hæðin hefur staðið á móti.

Í dag er útlit fyrir að áðurnefnd þrástaða í veðrakerfum muni brotna upp og veðrið breytist. Áðurnefnd hæð þokast til suðurs yfir Írland, sem gerir lægðinni við Hvarf kleift að þokast til norðausturs og senda nokkuð efnismikið regnsvæði yfir landið. Áttin verður áfram suðlæg og yfirleitt stinningskaldi eða allhvass vindur. Það fer að rigna, fyrst vestanlands og má búast við talsverðri úrkomu í suðvesturfjórðungi landsins þegar líður að kvöldi. Áfram hlýtt í veðri miðað við árstíma. Á Austurlandi hangir þurrt fram á nótt.

Þegar regnsvæðið hefur gengið yfir í kvöld og nótt, þá dregur úr vindi og úrkomu, það gerist fyrst vestast á landinu. Á morgun er útlit fyrir vestlæga golu eða kalda. Skýjað að mestu og sums staðar lítilsháttar skúrir eða slydduél, en bjart veður á Suðausturlandi og Austfjörðum. Hiti 0 til 5 stig.

Um helgina er síðan tiltöluega rólegt veður og úrkomulítið í kortunum, en hitatölurnar fara niðurávið og verður væntanlega komið frost á öllu landinu áður en helgin er á enda,“ segir í tilkynningunni.

Veðurhorfur á landinu næstu daga

Á föstudag: Vestan 5-13 m/s. Skýjað að mestu og sums staðar lítilsháttar skúrir eða slydduél, en bjartviðri á Suðausturlandi og Austfjörðum. Hiti 0 til 6 stig.

Á laugardag: Norðlæg eða breytileg átt 3-10. Skýjað með köflum og dálítil él á víð og dreif. Frost 0 til 8 stig, kaldast norðaustanlands, en hiti 0 til 4 stig við suður- og vesturströndina fram eftir degi.

Á sunnudag: Norðan 3-8, en 8-13 við austurströndina. Bjart með köflum, en svolítil él á austanverðu landinu. Kólnandi veður.

Á mánudag: Norðaustan- og austanátt og líkur á snjókomu eða éljum í flestum landshlutum. Frost 2 til 12 stig.

Á þriðjudag og miðvikudag: Norðanátt með éljum norðan- og austanlands, en bjart sunnan heiða. Kólnar enn frekar í veðri.