Gular við­varanir víðs vegar um landið

Það eru Suðurland, Faxaflói, Vestfirðir, Norðurland eystra, Austurland að glettingi, Austfirðir, og Suðausturland. Viðvörunin er ýmist vegna hvassviðris, storms eða hríðar.

Fyrsta viðvörunin tók gildi klukkan 8:25 í morgun á Suðurlandi, en hún stendur yfir til klukkan níu í kvöld. Síðasta viðvörunin tekur gildi klukkan átta í kvöld og mun standa yfir til klukkan sex á morgun, mánudag.

Í lýsingum Veðurstofunnar fyrir nokkra landshluta segir að varasamt sé fyrir vegfarendur með aftanívagna eða á ökutækjum sem taka á sig mikinn vind að vera á ferðinni. Þá er fólk hvatt til að sýna aðgát og ganga frá lausum munum.

„Lægð suðvestur í hafi kemur upp að Reykjanesi í dag. Henni fylgir allhvöss austanátt á sunnanverðu landinu, en stormur syðst. Heldur hægari norðanlands. Rigning á sunnanverðu landinun, en rigning eða slydda norðantil upp úr hádegi og snjókoma til fjalla. Færð gæti spillst seinnipartinn á fjallvegum á Norður- og Austurlandi og hafa verið gefnar út gular viðvaranir vegna þess, einning vegna vinds syðra,“ segir í hugleiðingu veðurfræðings.

„Í kvöld og nótt fara skil lægðarinnar norður yfir land og veðrið skánar. Á morgun er útlit fyrir minnkandi sunnanátt með dálitlum skúrum, en nokkuð samfelldri rigningu á Suðausturlandi. Það hlýnar í veðri og hiti ætti að komast í 12 til 13 stig norðan- og austanlands.“

Veðurhorfur á landinu næstu daga:

Á þriðjudag:

Suðlæg eða breytileg átt 3-10 m/s og skúrir, en styttir upp um landið austanvert seinnipartinn. Hiti 6 til 12 stig.

Á miðvikudag:

Suðvestan 5-13 en austlæg átt 5-10 á Vestfjörðum. Skúrir á vestanverðu landinu en lengst af þurrt austanlands. Hiti breytist lítið.

Á fimmtudag:

Vestlæg átt 3-10 og stöku skúrir, en suðaustanátt og fer að rigna sunnan- og vestanlands undir kvöld. Hiti 3 til 10 stig.

Á föstudag:

Suðaustlæg átt og súld eða rigning sunnan- og vestanlands, en dregur úr úrkomu síðdegis. Bjart með köflum á Norður- og Austurlandi. Hiti 9 til 14 stig.

Á laugardag:

Útlit fyrir austlæga átt. Lítilsháttar væta um sunnan- og vestanvert landið en bjart að mestu fyrir norðan og austan. Hlýtt í veðri.