Skúrir síð­degis í dag

Á morgun er alldjúpri lægð spáð sem mun koma upp að landinu úr suðri. Hvassviðri verður á Suðausturlandi og þá mun fara rigna í norðaustan strekkingi. Veðurstofan varar við því að fólk verði á ferð í ökutækjum á Suðausturlandi sem taki á sig mikinn vind. Þó segir að búist sé við því að það fari að lægja annað kvöld.

Töluverðri rigningu er víða spáð með lægðinni, mest þó á Austfjörðum.

Lægðin muni síðan fara norðvestur yfir land á þriðjudag. Þá snýst í suðvestan kalda með vætu af og til, þó síst norðaustanlands. Hiti verður þá á bilinu tíu til átján stig og hlýjast á Norðaustur- og Austurlandi.

Veðurhorfur á landinu næstu daga

Á mánudag:

Gengur í norðaustan 8-15 og fer að rigna, en 13-20 m/s suðaustantil fram undir kvöld. Talsverð rigning um tíma á Austfjörðum. Hiti 8 til 14 stig.

Á þriðjudag:

Sunnan og suðvestan 5-13 m/s. Væta með köflum, en lengst af þurrt norðaustanlands. Hiti 10 til 18 stig, hlýjast norðaustantil.

Á miðvikudag:

Austlæg átt og rigning, en úrkomulítið á Norðurlandi. Hiti breytist lítið.

Á fimmtudag:

Breytileg átt og rigning vestantil, en skúrir um landið austanvert, einkum síðdegis. Hiti 8 til 14 stig.

Á föstudag og laugardag:

Norðanátt og súld eða rigning, en úrkomulítið sunnan heiða. Hiti 7 til 15 stig, mildast syðst. Dregur úr vætu á laugardag.