Hvernig verður steypa græn?

BM Vallá er með metnaðarfullt markmið um að starfsemin verði kolefnishlutlaus árið 2030, og með framleiðslu á vistvænni steypu sér fyrirtækið raunhæfa leið til að draga úr neikvæðum umhverfisáhrifum byggingargeirans.

„Áherslur okkar miðast að því að draga úr notkun sements og gera það vistvænna þar sem sementið ber ábyrgð á 85-90% af kolefnisspori steypu,“ útskýrir Sigríður Ósk Bjarnadóttir, framkvæmdastjóri umhverfis- og gæðamála. „Þrátt fyrir að sementið telji ekki til loftslagsbókhalds landsins teljum við mikilvægt að taka ábyrgð á allri losun sem tengist framleiðslu okkar. Þess vegna er það í forgangi að gera steypuna okkar vistvænni því það hefur mestu áhrifin þegar kemur að því að minnka kolefnisspor steypu og gera hana þannig grænni.“ Hún bætir við að Berglind, vistvænni steypa frá BM Vallá, fáist með allt að 45% minna kolefnispor heldur en sambærileg steypa.

Raunverulegur ávinningur fyrir umhverfið

Viðskiptavinir BM Vallár eru metnaðarfullir þegar kemur að umhverfisvænni lausnum og hafa því tekið Berglindi fagnandi. „Notkun Berglindar í stórum mannvirkjaframkvæmdum hefur m.a. leitt til þess að kolefnisspor steypunnar í húsinu minnkaði um 35%. Þetta eru frábærar fréttir fyrir bæði umhverfið og byggingargeirann sem á heimsvísu sem er ábyrgur fyrir um 40% losun gróðurhúsalofttegunda,“ upplýsir Sigríður.

Steinsteypa er uppistaða byggingarefnis hér á landi, enda u.þ.b. 70% allra bygginga byggð úr steinsteypu vegna styrkleika hennar og endingu. Efnið hefur reynst mikilvægt í íslensku samhengi, þar sem það þolir bæði jarðskjálfta og kröftugt norðlægt veðurfar. BM Vallá byggir á hátt í 70 ára sögu í framleiðslu traustra byggingarefna, þar á meðal steinsteypu, hellna, hleðslusteina, múr- og flotblanda og steinsteyptra eininga.

Skapandi hugsun

Umhverfisáherslur BM Vallár byggja á nánu samstarfi við hönnuði, verkkaupa og birgja til að þróa grænar lausnir og mæta ströngum umhverfiskröfur. Viðurkenning SA um Umhverfisfyrirtæki ársins staðfestir árangurinn af metnaðarfullu starfi BM Vallár á sviði umhverfismála, þar sem dómnefndin tók sérstaklega fram gróskuna og nýsköpunina sem hefur einkennt starfsemina á síðustu árum. Stefna fyrirtækisins, ásamt skapandi hugsun og vistvænum lausnum, undirstrikar hæfni BM Vallár til að stuðla að sjálfbærari framtíð.

„Það er mikill hvati fyrir okkur hjá BM Vallá að vera valið Umhverfisfyrirtæki ársins og erum við þakklátt fyrir þann heiður sem mun hvetja okkur enn frekar við þróun umhverfisvænna lausna í byggingariðnaði,“ segir Sigríður Ósk að lokum.