Stormur á Aust­fjörðum

Í hugleiðingum veðurfræðings segir að él séu á norðanverðu landinu en yfirleitt verði léttskýjað sunnan- og vestanlands.

Gul viðvörun tekur gildi á Austfjörðum vegna hvassviðris eða storms klukkan 10 í dag og er í gildi til klukkan 21 í kvöld. Má reikna með vindhviður nái 35 til 40 metrum á sekúndu. Varasamar aðstæður gætu skapast fyrir ökutæki sem taka á sig mikinn vind.

Frost verður á bilinu núll til sjö stig en í kvöld nálgast skil suðvesturhornið og þá mun snúast í suðaustanátt og þykkna upp.

Í fyrramálið verður svo suðvestan 8-15 m/s með skúrum eða éljum og hiti á bilinu 1 til 6 stig, en birtir til norðaustan- og austanlands og vægt frost þar.

Veðurhorfur á landinu næstu daga

Á laugardag: Sunnan og suðvestan 10-15 m/s. Slydda og síðar rigning og hiti 1 til 6 stig, en úrkomulítið og vægt frost norðanaustanlands framan af degi. Kólnar með éljum um kvöldið á vestanverðu landinu.

Á sunnudag: Suðvestlæg átt, 8-15 m/s og éljagangur, en úrkomulítið austanlands. Snýst í norðan 5-13 norðantil seinnipartinn. Frost víða 0 til 5 stig, en frostlaust við suðurströndina.

Á mánudag: Fremur hæg breytileg átt og víða él, en þurrt að kalla austanlands. Frost 0 til 12 stig, kaldast norðaustantil.

Á þriðjudag: Suðlæg átt og snjókoma eða él, en lengst af úrkomulaust norðaustantil. Áfram kalt í veðri. Hvessir og hlýnar um kvöldið.

Á miðvikudag: Ákveðin norðlæg eða breytileg átt með ringingu eða slyddu, en snjókomu vestan- og norðvestanlands.

Á fimmtudag: Útlit fyrir norðanátt með snjókomu, en að mestu þurrt sunnan heiða.