Klara frá Kerecis til Arterna Biosciences

Í tilkynningu frá Arterna Biosciences kemur fram að hjá Kerecis hafi Klara meðal annars gegnt framkvæmdastjórastöðum, verið ábyrg fyrir sölu og viðskiptaþróun í Evrópu og Asíu, gæða- og skráningarmálum og framleiðslu og vöruþróun félagsins.

Klara starfaði áður hjá Icepharma og Actavis og býr að áralangri reynslu í lyfjageiranum. Hún er lyfjafræðingur frá Háskóla Íslands og með MBA gráðu frá Háskólanum í Reykjavík.

„Klara býr yfir yfirgripsmikilli þekkingu á markaðssetningu líftækniafurða og þeim þróunarferlum sem ung líftæknifyrirtæki vinna eftir. Við hjá Arterna erum mjög spennt að fá Klöru í þetta hlutverk og hlökkum til að vinna með henni að framtíðarverkefnum félagsins“ segir Margrét Helga Ögmundsdóttir, einn stofnenda Arterna Biosciences. Auk Margrétar Helgu, eru Eiríkur Steingrímsson og Steingrímur Stefánsson stofnendur fyrirtækisins.

Mikil framþróun

Í tilkynningunni segir að Arterna Biosciences hafi verið stofnað árið 2021 og þróað nýjar lausnir til þess að bæta gæði RNA í framleiðslu. Gæði RNA séu lykilatriði þegar komi að virkni RNA lyfja og rannsókna sem byggja á líffræði RNA.

„Undanfarin ár hefur orðið mikil framþróun í nýrri tækni sem gerir kleift að nýta RNA sameindir sem lyfjaform. Bóluefni hafa verið þróuð og samþykkt sem RNA lyf. Verið er að þróa RNA meðferðarmöguleika við margvíslegum sjúkdómum svo sem krabbameinum. Mörg lyfjamörk eru í þróun og viðbúið að bylting verði á þessu sviði á næstu árum,“ segir í tilkynningunni.

Mikilvægt að koma á markað sem fyrst

Haft er eftir Klöru að hún sé gríðarlega spennt fyrir þeim nýjungum sem Arterna hafi þróað og telji afar mikilvægt að koma þeim á markað sem fyrst. 

„Vörurnar eru einkum miðaðar að RNA lyfjaframleiðslu en ná einnig til líftæknifyrirtækja og rannsóknastofnana. Áhersla fyrirtækisins á að bæta gæði RNA lyfja er mikilvæg þegar fjölmörg RNA lyf eru í þróun á heimsvísu og því eru spennandi tímar framundan,“ segir Klara.