Sár Verstappen hótar sniðgöngu

Um var að ræða fyrsta skiptið þar sem For­múlu 1 mótaröðin heldur slíkt frumsýningar­kvöld þar sem liðin sýndu á spilin er varðar lita­val á bílum sínum og ytra út­liti. Ekki var um frumsýningu liðanna á hönnun síns bíls að ræða.

Hvert lið og öku­menn þeirra voru kynntir inn með miklum til­þrifum á um­ræddu kvöldi en þegar kom að því að kynna til leiks lið Red Bull Ra­cing, öku­menn þess og liðs­stjóra mátti heyra hávært baul í O2 höllinni.

Er varðar liðs­stjórann Christian Horn­er má leiða líkum að því að baulið í hans garð hafi tengst ásökunum sem spruttu upp fyrir síðasta tíma­bil um meinta óvið­eig­andi hegðun Bretans í garð kven­kyns starfs­manns Red Bull.

Baulið varð síðan enn kröftugra þegar að Max Ver­stappen, heims­meistari ökuþóra síðustu fjögurra ára var kynntur til leiks og virðist mikil vel­gengni hans í gegnum árin, sem og barátta hans við For­múlu 1 ökuþóra Bret­lands, hafa farið illa í ákveðinn hóp stuðnings­manna annarra liða í For­múlu 1.

Um­rætt baul fór í það minnsta afar illa í Ver­stappen og faðir hans, fyrr­verandi For­múlu 1 ökuþórinn Jos Ver­stappen, segir son sinn íhuga að snið­ganga viðburðinn í framtíðinni.

„Max hefur ekki húmor fyrir því að baulað sé á hann fyrir framan 25 þúsund áhorfendur,“ sagði Jos um at­vikið í sam­tali við hollenska miðilinn RaceXpress og sagði enn fremur að í samtölum sínum við son sinn hefði komið fram að Max myndi ekki mæta á viðburðinn á næsta ári verði hann haldinn á Eng­landi. „Og ég er full­kom­lega sammála honum,“ bætti Jos við.

Eftir frumsýningu hvers liðs á um­ræddu kvöldi tjáðu liðs­stjórar og öku­menn þeirra í ör­stuttu máli. At­hygli vakti hins vegar að full­trúar Red Bull Ra­cing voru þeir einu sem að tjáðu sig ekki fyrir framan fjöldann í O2 höllinni.

Tíma­bilið ekki byrjað en dramað er svo sannar­lega farið af stað. Innan við mánuður er í fyrstu keppnis­helgi tíma­bilsins í Mel­bour­ne í Ástralíu 14. – 16. mars. Fyrstu form­legu prófanir liðanna hefjast í Bar­ein á miðviku­daginn kemur. Voda­fone sport rásin er heimili For­múlu 1 á Ís­landi.