Él sunnan- og vestan­lands og hvessir í kvöld

Á vef Veðurstofunnar segir að hiti verði í kringum frostmark. Það mun víða stytta upp seinnipartinn.

„Víðáttumikil lægð við Nýfundnaland er á leið norðaustur og dýpkar, og í kvöld nálgast hún landið. Þá gengur í vaxandi suðaustanátt með rigningu á Suður- og Vesturlandi og hlýnar. Sunnan hvassviðri eða stormur framan af morgundeginum, vætusamt og hlýtt veður. Síðdegis dregur úr vindi og kólnar með éljum um landið sunnan- og vestanvert,“ segir á vef Veðurstofunnar.

Gular viðvaranir hafa verið gefnar út á Breiðavirði, Vestfjörðum, Miðhálendi og Ströndum og Norðurlandi vestra sem taka gildi seint í kvöld og eru í gildi fram á miðjan dag á föstudag.

Áfram er svo útlit fyrir umhleypingasamt veður um helgina.

Veðurhorfur á landinu næstu daga

Á föstudag: Sunnan 15-23 m/s og rigning, hvassast vestantil, en úrkomuminna norðaustanlands. Hiti 2 til 9 stig. Suðvestan 10-18 síðdegis og kólnar með éljum um landið sunnan- og vestanvert.

Á laugardag: Suðvestan 13-20 og él, en úrkomulítið á Austurlandi. Hiti 0 til 5 stig. Dregur úr vindi síðdegis, en gengur í suðaustan 10-18 með rigningu sunnan- og vestanlands um kvöldið og hlýnar.

Á sunnudag: Snýst í suðvestan 15-20 með éljum, en þurrt að kalla um landið norðaustanvert. Kólnar í veðri.

Á mánudag: Vestan- og suðvestanátt og allvíða él. Hiti víða í kringum frostmark. Suðlægari um kvöldið og rigning eða slydda suðvestantil.

Á þriðjudag: Vaxandi suðlæg átt og víða rigning eða slydda. Hlýnar í veðri, hiti víða 2 til 8 stig um kvöldið.

Á miðvikudag: Útlit fyrir suðvestlæga átt og kólnar með éljum.