Robertson vildi ekki ræða Liverpool

Robertson var tekinn tali á Hampden Park í Glasgow í gær en undirritaður fékk þá beiðni frá skoska knattspyrnusambandinu að ekki spyrja Robertson út í Liverpool. Hann nennti ekki að ræða félagslið sitt.

Það virðist sem skoskir blaðamenn hafi fengið álíka tilmæli þar sem Robertson var lítið sem ekkert spurður út í félagslið sitt á blaðamannafundi í gær.

Liverpool er sagt vera að klófesta Ungverjann Milos Kerkez frá Bournemouth en sá leikur sem vinstri bakvörður, líkt og Robertson. Leiktími Skotans gæti því farið minnkandi á næstu leiktíð en fastlega er búist við því að Kostas Tsimikas yfirgefi Liverpool við tilkomu Kerkez.

Robertson er fæddur og uppalinn hér í Glasgow en Celtic leysti hann undan samningi þegar hann var 15 ára gamall. Hann kom sér þá að hjá áhugamannaliði Queen's Park. Eftir eina leiktíð þar og eina hjá Dundee United fór hann til Hull City á Englandi en fann svo sinn samastað hjá Liverpool árið 2017.

Robertson hefur spilað tæplega 350 leiki fyrir Bítlaborgarliðið og verið meðal betri vinstri bakvarða heims undanfarin ár.

Viðtalið við Robertson þar sem Liverpool kemur ekki við sögu, má sjá í spilaranum.

Leikur Skotlands og Íslands er klukkan 18:45 í kvöld. Leikurinn verður sýndur beint á Stöð 2 Sport og hefst útsending klukkan 18:20.