Fótbolti

Endurkomusigur hjá Grinda­vík þrátt fyrir rautt spjald

Ágúst Orri Arnarson skrifar
Grindavík vann fyrsta leikinn í Grindavík síðan liðið flutti aftur heim.
Grindavík vann fyrsta leikinn í Grindavík síðan liðið flutti aftur heim. Knattspyrnudeild Grindavíkur UMFG

Grindavík vann 2-1 gegn HK þrátt fyrir að lenda undir í fyrri hálfleik og verða svo manni færri í seinni hálfleik, í sjöundu umferð Lengjudeildar karla í fótbolta. Ármann Ingi Finnbogason lagði bæði mörkin upp fyrir heimamenn.

Arnþór Ari Atlason kom HK yfir eftir rúmlega hálftíma en leikurinn hafði verið fremur rólegur fram að því.

Staðan versnaði svo fyrir Grindvíkinga um miðjan seinni hálfleik þegar Adam Árni Róbertsson fékk tvö gul spjöld með stuttu millibili fyrir slæmar tæklingar, þar af leiðandi rautt og var rekinn af velli.

Marki undir og manni færri tók Grindvíkingurinn Ármann Ingi Finnbogason til sinna ráða. Hann ógnaði marki sjálfur og átti síðan tvær stoðsendingar eftir frábæra spretti upp kantinn.

Fyrst lagði Ármann upp mark fyrir Sindra Þór Guðmundsson á 83. mínútu og skömmu síðar lagði hann upp mark beint úr hornspyrnu fyrir Dennis Nieblas.

2-1 endurkomusigur niðurstaðan í Grindavík í fyrsta leik sjöundu umferðar Lengjudeildarinnar. Grindavík hefur þó aðeins spilað sex leiki eftir að leik liðsins gegn Keflavík í síðustu umferð var frestað. Grindavík hefur nú safnað tíu stigum, einu minna en HK.




Fleiri fréttir

Sjá meira


×