„Var að hugsa hvort ég vildi spila í tvo daga til við­bótar“

Norður-írski kylfingurinn Rory McIlroy tryggði sér fyrr á árinu sigur í Mastersmótinu í golfi eftir dramatískan sigur í umspili. Hann hefur hins vegar ekki sýnt sömu spilamennsku á mótinu nú og ræddi þann pirring við fjölmiðla. Þá sagði Rory að hann hefði unnið sér inn réttinn til að gera það sem hann vildi þegar kæmi að því að ræða við fjölmiðla.

„Heldur miðlungs,“ sagði McIlroy um frammistöðu dagsins. Aðspurður út í þá staðreynd að hann hafi spilað síðustu 15 holurnar á öðrum hring á tveimur undir pari og þar með komist í gegnum niðurskurðinn sagði kylfingurinn:

„Það er miklu auðveldara þegar manni er alveg sama hvort maður er hér alla helgina eða ekki. Ég var að hugsa hvort ég vildi spila tvo daga til viðbóta. Það er auðveldara að spila með það hugarfar,“ sagði Norður-Írinn og hló.

McIlroy er sem stendur jafn þremur öðrum kylfingum í 52. sæti á tíu höggum yfir pari. J. J. Spaun leiðir á þremur höggum undir pari.