Þurfa að færa leik í ensku úr­vals­deildinni vegna krikketmóts

Sá leikur sem færist til er leikur landsliðsmarkvarðarins Hákons Rafns Valdimarssonar og félaga hans í Brentford.

Brentford mætir Nottingham Forest á útivelli í fyrstu umferðinni og leikurinn var settur á laugardaginn 16. ágúst.

Nú hefur hann hins vegar verið færður yfir á sunnudaginn 17. ágúst. Brentford sagði frá þessu á heimasíðu sinni.

Ástæðan fyrir þessari breytingu er krikketmótið The Hundred.

The Hundred mótið fer þó ekki fram á heimavelli Nottingham Forest, City Ground, heldur á Trent Bridge sem er krikketleikvangur í nágrenninu.

Til að forðast það að svona tveir stórir viðburðir fari fram á sama tíma, á nánast sama stað, var tekin sú ákvörðun að færa fótboltaleikinn aftur um einn dag.

Frá Trent Bridge krikket leikvanginum eru aðeins 350 metrar yfir á City Ground leikvanginn.