Ákvörðunin að reka Horner að mestu vegna slaks árangurs

Runólfur Trausti Þórhallsson skrifar 29. júlí 2025 20:15

Eftir hvern heimsmeistaratitilinn á fætur öðrum var Horner látinn fara þegar halla fór undan fæti. Kym Illman/Getty Images

Christian Horner var látinn fara sem liðsstjóri Red Bull í Formúla 1 kappakstrinum eftir meira en 20 ár við stjórnvölin. Ráðgjafi félagsins segir að ákvörðunin sé að mestu byggð á slökum árangri liðsins að undanförnu.

Frægðarsól hins 51 árs gamla Horner reis hátt þökk sé Formúlu 1 þáttunum á Netflix. Þá giftist hann Kryddpíunni fyrrverandi, Geir Halliwell, árið 2015. Á síðasta ári var Horner yfirheyrður vegna ásakana um óviðeigandi hegðun.

Á endanum var Horner hreinsaður af ásökunum og hann hélt starfi sínu, um tíma allavega. Það var svo 16 mánuðum síðar sem Horner var látinn taka poka sinn. Segja má að tíðindin hafi komið eins og þruma úr heiðskíru lofti.

Nú hefur Helmut Marko, sérstakur ráðgjafi Red Bull, tjáð sig við þýska arm Sky Sports. Hann segir að ákvörðunin að reka Horner hafi verið byggð á mörgum mismunandi þáttum en sá helsti var slakur árangur á kappakstursbrautinni.

Laurent Mekies tók við starfi Horner. Hann hafði áður rekið Racing Bulls, hálfgert ungingastarf Red Bull-liðsins. Hans verkefni er nú að brúa bilið að McLaren sem hefur borið af á yfirstandandi keppnistímabili.

Akstursíþróttir