Hringt í flesta eigendur í Formúlu 1 eftir brottreksturinn frá Red Bull

Ingvi Þór Sæmundsson skrifar 3. október 2025 19:16

Christian Horner vill komast aftur inn í Formúlu 1. epa/ANNA SZILAGYI

Christian Horner, sem var rekinn sem liðsstjóri Red Bull í sumar, hefur látið eigendur liðanna í Formúlu 1 vita af áhuga sínum að starfa áfram í keppninni.

Horner var látinn fara frá Red Bull í júlí eftir tuttugu ár við stjórnvölinn hjá liðinu. Engin ástæða var gefin fyrir brottrekstrinum en hneyklismál tengd Horner og hegðun hans í garð starfsmanna komu upp fyrir rúmu ári.

Horner vill starfa áfram í Formúlu 1 og samkvæmt framkvæmdastjóra Aston Martin, Andy Cowell, hefur hann ekki farið leynt með þann áhuga sinn.

„Það lítur út fyrir að Christian sé að hringja í nánast alla eigendurna um þessar mundir,“ sagði Cowell sem þvertekur fyrir að Aston Martin ætli að ráða Horner í starf hjá liðinu.

Liðsstjóri Haas staðfesti einnig að Horner hefði sett sig í samband við liðið. Þá eru þeir Flavio Briatore, eigandi Alpine, gamlir vinir.

Horner má taka til starfa hjá nýju liði í Formúlu 1 um mitt næsta ár. Samkvæmt BBC fékk hann starfslokagreiðslu frá Red Bull upp á 52 milljónir punda, eða næstum því átta og hálfan milljarð íslenskra króna.

Akstursíþróttir