„Þeir sem stunda inn­brot í tölvu­kerfi leita alltaf veikustu hlekkjanna“

Arnar S. Gunnarsson, öryggisstjóri OK, segir mælingar jafnframt sýna að tölvur verði viðkvæmari fyrir árásum hakkara séu stýrikerfin ekki uppfærð.

„Það sem þetta þýðir er að Microsoft er hætt að veita Windows 10 stuðning og gefur ekki lengur út uppfærslur. Windows 10 er orðið tíu ára gamalt stýrikerfi og bara í apríl á þessu ári uppgötvuðust sautján öryggisveikleikar í stýrikerfinu. Það eru einmitt þeir sem verður hætt að lagfæra. Slíkir veikleikar geta leyft hökkurum að komast yfir gögn, lykilorð eða jafnvel stjórn á tölvum. Tölvurnar sjálfar halda áfram að virka en frá og með morgundeginum munu ekki berast fleiri uppfærslur frá Microsoft,“ segir Arnar.

Lítil áhætta fyrst

Hann segir áhættuna litla fyrstu dagana en að hún muni aukast eftir því sem líður á.

„Þeir sem stunda innbrot í tölvukerfi leita alltaf veikustu hlekkjanna,“ segir hann og að úrelt kerfi og tölvur verði þannig aðlaðandi skotmörk fyrir slíkar árásir.

Arnar bendir á að með tímanum muni annar hugbúnaður líka hætta að styðja Windows 10.

„Það getur gerst hraðar en margir gera sér grein fyrir og algengt verður að forrit hætti að virka eftir uppfærslur. Fyrirtæki sem treysta á tækniaðstoð frá Microsoft gætu einnig lent í vandræðum, því þeir samningar falla líka út þegar stuðningi lýkur,“ bætir hann við.

Arnar segir að flestar nýrri tölvur sé hægt að uppfæra beint í Windows 11.

„Þetta er ráðlegasta leiðin og tryggir áframhaldandi öryggi og samhæfni. Þar sem tæki styðja ekki uppfærslu í Windows 11 er nauðsynlegt að fara í útskipti á vélbúnaði og við mælum með því.“

Hann segir Microsoft hafa ákveðið, samhliða þessari uppfærslu, að gefa fyrsta árið frítt af svokölluðum ESU-samningi [e. Extended Security Updates] sem muni tryggja áframhaldandi öryggisuppfærslur. Því muni fylgja einhverjar kvaðir og takmarkanir.

„Þessar kvaðir eru til dæmis að þú verður að nota svokallaðan skýjanotanda frá Microsoft á tölvunni þannig að það mun ekki henta mörgum fyrirtækjum. OK ráðleggur sínum viðskiptavinum að uppfæra í Windows 11 þar sem það er mögulegt og að endurnýja tölvur þar sem það á ekki við. ESU-samningar ættu aðeins að vera notaðir sem bráðabirgðalausn, ekki til langs tíma.“