Al­gjör upp­lausn í úr­slita­leik Afríkukeppninnar: „Farsakennt“

Fréttin verður uppfærð eftir því sem leiknum vindur fram. Nú stendur yfir framlenging og staðan 1-0 Senegal í vil.

Þegar langt var liðið á uppbótartíma venjulegs leiktíma í úrslitaleik Marokkó og Senegal, ákvað dómari leiksins að dæma vítaspyrnu, Marokkó í hag, fyrir afar litlar sakir í stöðunni 0-0 og það var þá sem allt varð vitlaust.

Skömmu áður hafði Ismaila Sarr komið boltanum í netið fyrir Senegal en markið stóð ekki þar sem dómarinn hafði skömmu áður en boltinn fór yfir línuna gefið Marokkó aukaspyrnu fyrir það sem aftur verður að teljast afar litlar sakir. 

Þegar að dómari leiksins, Jean-Jacques Ndala, dæmdi vítaspyrnu skipaði bálreiður Pape Thiaw, landsliðsþjálfari Senegal, leikmönnum sínum að yfirgefa völlinn í mótmælaskyni.

Það varð allt brjálað innan vallar sem og upp í stúku eftir ákvarðanir dómarans sem ræddi við þjálfara beggja liða í kjölfarið. Þau samtöl báru ekki árangur og strunsaði Thiaw með alla leikmenn sína nema Sadio Mané inn til búningsherbergja. 

Það var Mané sjálfur sem fékk liðsfélaga sína til þess að snúa aftur inn á völlinn. Vítaspyrnudómur Jean-Jacques stóð og það var Brahím Díaz sem tók spyrnuna fyrir Marokkó. 

Svo fór að hann reyndi paneka spyrnu af vítapunktinum og Edouard Mendy, markvörður Senegala átti ekki í vandræðum með að verja hana. 

Leiktíminn rann út, staðan enn markalaus og grípa þurfti til framlengingar sem er nú í gangi.  

Þegar að þetta er skrifað er Pape Gueye búinn að koma Senegal yfir í fyrri hálfleik framlengingarinnar.

Hægt er að fylgjast með beinni textalýsingu frá leiknum á vef The Athletic. Blaðamaður miðilsins, Max Mathews, segir framvindu leiksins farsakennda.