Keppnir í hættu vegna stríðsins

Bæði Barein og Sádi-Arabía hafa orðið fyrir sprengjuárásum Írana eftir árásir Ísraels og Bandaríkjanna í Íran. Skotflaugar hafa hæft hótel og orkuinnviði í ríkjunum tveimur auk þess sem bandarískar herstöðvar hafa verið sérstök skotmörk árása Írans.

Fjórða Formúlu 1-keppni tímabilsins á að fara fram í Barein helgina 10.-12. apríl og keppnin í Sádi-Arabíu á að fara fram í Jeddah viku síðar.

Bandarísk herstöð í bareinsku höfuðborginni Manama hefur orðið fyrir sprengjuárásum Írans. Herstöðin er staðsett í Juffair hluta borgarinnar, en þar gista iðulega stór hluti starfsfólks í kringum Formúlu 1-keppnir sem fara þar fram.

Formúla 1 gaf frá sér yfirlýsingu vegna málsins þar sem segir:

„Næstu þrír kappakstrar eru í Ástralíu, Kína og Japan, en ekki í Miðausturlöndum. Þær keppnir eru ekki fyrr en eftir nokkrar vikur,“

„Við munum ávallt fylgjast vel með framvindu mála og vinna náið með viðeigandi yfirvöldum þar sem öryggi þeirra sem vinna í íþróttinni er ávallt forgangsatriði.“

Fimm vikur eru þar til kappaksturinn í Barein á að fara fram en ákvörðun um hvort hann fari fram, verði aflýst eða færður til þarf að liggja fyrir í síðasta lagi tveimur vikum fyrr.

Tímabilið hefst í Formúlu 1 um helgina í Melbourne í Ástralíu.

Dagskráin í Formúlu 1 þessa vikuna:

• 5. mars
• 1:30 Æfing 1 (Sýn Sport Viaplay)
• 5:00 Æfing 2 (Sýn Sport Viaplay)
• 6. mars
• 1:30 Æfing 3 (Sýn Sport Viaplay)
• 5:00 Tímataka (Sýn Sport Viaplay)
• 7. mars
• 3:30 Kappakstur (Sýn Sport Viaplay)