Max Verstappen rétt missti af sigri

Ökuþórinn Max Verstappen keyrði í þrekaksturskeppninni 24h Nürburgring þar sem lið keyra sama bílinn í kringum Nürburgring-brautina stanslaust í tuttugu og fjóra tíma. Liðsfélagar Verstappen í keppninni voru Dani Jucadella, Jules Gounon og Lucas Auer.

Verstappen sýndi strax góðan hraða og var liðið komið í góða stöðu í keppninni. Stærsta framlag Verstappen kom um klukkan hálf tvö um nótt á staðartíma þegar hann tók fram úr Maro Engel og náði forystunni.

Þegar líða fór að morgni var liðið komið með gott forskot í fyrsta sætinu og virtist ætla að sigla sigrinum þægilega heim.

Svo reyndist ekki því þegar þrjár klukkustundir voru eftir af keppninni byrjaði bíllinn að bila. Þegar komið var á þjónustusvæðið til að gera við bílinn kom í ljós að drifskaft bílsins var ónýtt og gátu þeir því ekki klárað keppnina.

„Virkilega pirrandi og óheppilegur endir á keppninni,“ segir Max eftir að hann og liðsfélagar hans komust að því að þeir gætu ekki lokið keppni.

Verstappen er sem stendur í sjöunda sæti í heimsmeistarakeppni ökuþóra í Formúlu 1 með aðeins 26 stig eftir fjórar keppnir. Ekki er víst að Verstappen haldi áfram keppni í Formúlu 1 þar sem hann er ósáttur við þróun bílanna og stöðu Red Bull liðsins.

Næsta keppni er í Kanada 24. maí og þar er tækifæri fyrir Red Bull-liðið að bæta stöðu sína í heimsmeistarakeppni bílasmiða þar sem þeir standa í fjórða sæti með þrjátíu stig, sextíu og fjórum stigum fyrir aftan McLaren i sætinu fyrir ofan.