Gætu þurft að stíga inn í eftir harða bar­áttu liðs­félaganna

Það er yngri og óreyndari ökuþór liðsins, Ítalinn Kimi Antonelli, sem leiðir stigakeppni ökuþóra með 43 stigum eftir keppnishelgi Formúlu 1 í Kanada um helgina. Antonelli vann þar sinn fjórða sigur á Formúlu 1 ferlinum, jafnframt þann fjórða í röð á meðan að liðsfélagi hans George Russell féll úr leik vegna vélarbilunar. 

Fyrir óhappið í bíl Russell höfðu hann og Antonelli verið að berjast hart um fyrsta sætið í keppninni en fyrr um keppnishelgina í sprettkeppni tókust þeir einnig á. Eftir þá keppni var boðaður liðsfundur þar sem reynt var að róa ökuþórana en það virðist ekki hafa skilið tilætluðum árangri með við gang keppninnar á sunnudaginn. Litlu mátti muna að þeir hefðu keyrt hvor annan úr keppninni. 

Barátta tveggja liðsfélaga hefur oft skotið upp kollinum í sögu Formúlu 1 og hefur sömuleiðis oft endað með ósköpum. Um þetta er Toto Wolff, liðsstjóri Mercedes, meðvitaður. Vissulega auki svona barátta skemmtanagildi mótaraðarinnar.

„En það er líka önnur hlið á þessu sem við þurfum að skoða. Þeir voru nálægt því að aka á hvorn annan í nokkur skipti,“ sagði Wolff í viðtali. „Það er mikilvægt fyrir okkur að rýna í stöðuna og ræða hana við ökuþórana. Hvort þeirra tilfinning sé að þetta væri of mikið og hvernig við getum forðast svona aðstæður.“

Mercedes sé með mesta hraðann í bíl sínum af liðunum í Formúlu 1 en þegar að Antonelli og Russell hafi verið að berjast hafi þeir um leið tapað tíma á keppinauta sína.

„Það gætu komið upp aðstæður þar sem við þurfum að stíga inn í.“