Gert að af­henda kúnnanum nýjan eyrna­hreinsi með mynda­vél

Þetta er niðurstaða kærunefndar vöru- og þjónustukaupa. Í úrskurðinum kemur fram að viðskiptavinurinn hafi keypt eyrnahreinsinn í vefverslun söluaðilans í maí 2025 á 5.990 krónur. Viðskiptavinurinn upplýsti svo verslunina um það í tölvupósti sex dögum síðar að ekki væri hægt að hlaða tækið og það því ónothæft.

Í svörum frá versluninni var viðskiptavininum boðið endurgreiðsla eða nýtt tæki sem hann þáði. Honum var þá leiðbeint af versluninni hvernig ætti að skila bilaða tækinu sem hann gerði. Ekkert varð hins vegar af afhendingu á nýjum eyrnahreinsi þrátt fyrir ítrekaðar óskir. Viðskiptavinurinn leitaði þá til kærunefndarinnar þar sem hann krafðist þess að fá sendan nýjan eyrnahreinsi.

Í niðurstöðukafla úrskurðarins segir að með vísun í lög um neytendakaup hvíli í þessu máli á versluninni að sýna fram á að tækið hafi ekki verið gallað við afhendingu. Verslunin kaus að láta málið ekki til sín taka fyrir nefndinni.

Með hliðsjón af gögnum var það mat kærunefndarinnar að versluninni bæri að afhenda viðskiptavininum nýjan eyrnahreinsi með myndavél, án kostnaðar og óhagræðis fyrir viðskiptavininn. Söluaðilanum er jafnframt gert að greiða 35 þúsund krónur vegna málskostnaðar.