„Ég ætla ekki að segja neitt sem ég má ekki segja“

Mikil ringulreið var innan golfheimsins þegar LIV-mótaröðin leit dagsins ljóst og voru margir kylfingar sem fóru úr PGA-mótaröðinni og Evrópumótaröðinni yfir til LIV fyrir miklar fjárhæðir. Gengi LIV hefur ekki verið jafn gott og fjárfestar voru að vonast eftir og mun stærsti hluti fjárfestinganna fara eftir tímabilið.

Jon Rahm er eitt stærsta nafnið á LIV-mótaröðinni en hann er mættur til keppni í Bretlandi eftir vonbrigðarframmistöðu á Opna breska risamótinu sem var síðustu helgi. Rahm endaði í 46. sæti mótsins og fékk áminningu frá dómurum mótsins eftir að hann kastaði kylfunni sinni á öðrum hring mótsins.

Á blaðamannafundi fyrir LIV-mót helgarinnar í Bretlandi var Rahm spurður út í framtíð sína og LIV.

„Ég veit hvað er í gangi bak við tjöldin en það er ekkert sem ég get deilt. Ég ætla ekki að segja neitt sem ég má ekki segja.“

Rahm segist oft vera misskilinn kylfingur þar sem hann er oft pirraður inni á vellinum. Hann segist þó ekki vera þannig utan vallar enda erfitt að kvarta þegar vinnan hans er að spila golf.

Óvíst er hvort LIV-mótaröðin leggi upp laupana eða hvort aðrir fjárfestar taki við mótaröðinni um lok tímabils. Ef LIV-mótaröðin hættir verður fróðlegt að sjá hvað verður um stærstu stjörnur mótaraðarinnar eins og Jon Rahm og Bryson DeChambeau en PGA-mótaröðin hefur verið treg að bjóða LIV-leikmönnum til baka