Róbert Frosti fagnaði sigri en Brann kastaði frá sér góðri for­ystu

Róbert var í byrjunarliði GAIS og lék allan leikinn þegar liðið bar sigurorð af Nordsjælland á heimavelli, 1-0, í 2. umferð forkeppni Sambandsdeildar Evrópu. Matteo de Brienne skoraði eina mark leiksins undir lok fyrri hálfleiks. Daníel Ingi Jóhannesson sat á varamannabekknum hjá Nordsjælland.

Róbert hefur verið í stóru hlutverki hjá GAIS á þessu tímabili. Hann hefur leikið nítján leiki í öllum keppnum og skorað þrjú mörk.

Landsliðsmarkvörðurinn Elías Rafn Ólafsson stóð á milli stanganna hjá Midtjylland sem laut í lægra haldi fyrir Besiktas, 1-0, á útivelli í 2. umferð forkeppni Evrópudeildarinnar.

Danska liðið var manni færri frá 15. mínútu og getur því ágætlega við úrslitin unað. Elías átti sinn þátt í að halda Tyrkjunum í skefjum en hann varði sex skot í leiknum.

Brann fór illa að ráði sínu og missti niður tveggja marka forskot gegn Universitatea Cluj frá Rúmeníu í 2. umferð forkeppni Sambandsdeildarinnar. Lokatölur 2-2.

Kristall Máni Ingason var í byrjunarliði Brann og lék fyrstu áttatíu mínúturnar. Sævar Atli Magnússon og Eggert Aron Guðmundsson komu báðir inn á sem varamenn á 66. mínútu.

Þetta var fyrsti leikur Eggerts síðan 27. nóvember en þá meiddist hann á hné í Evrópuleik gegn PAOK.

Rúnar Alex Rúnarsson varði mark FC Kaupmannahafnar í 3-3 jafntefli við Polissya Zhytomyr í 2. umferð forkeppni Sambandsdeildarinnar. Viktor Bjarki Daðason var fjarri góðu gamni hjá FCK vegna meiðsla.