Bílabúð Benna

Um helgina verður Evrópufrumsýning á nýrri línu Chevrolet-bíla hjá Bílabúð Benna. General Motors, stærsti bílaframleiðandi í heimi, hefur ákveðið að bjóða þekktasta merki sitt, Chevrolet, um allan heim. Chevrolet hefur keypt Daewoo-verksmiðjurnar í Kóreu og mun frá áramótum hætta að framleiða bíla undir merki Daewoo. Í tilefni af þessum breytingum hefur verið hönnuð ný lína, Chevrolet Lacetti, sem keppa á við japanska og evrópska bíla. Bílarnir eru ríkulega búnir og á góðu verði. Bílabúð Benna kemur til með að bjóða þessa nýju línu á Ísland. Lacetti CDX station er til dæmis gríðarlega vel búinn og rúmgóður fjölskyldubíll á afar hagstæðu verði, eða 1.789 þúsund kr. með 1,8 lítra vél. Allur frágangur er eins og best gerist í mun dýrari bílum. Nýr lúxusjeppi er væntanlegur frá Chevrolet árið 2006, en hann var sýndur og fékk mikla athygli á alþjóðlegu bílasýningunni í París í september. Þar er á ferðinni sjö manna fullkominn jeppi sem fæst bæði með bensínvél og óvenjuöflugri dísilvél. Á næsta ári verður Bílabúð Benna 30 ára. Á þeim tímamótum flytur fyrirtækið í nýtt, stórt og glæsilegt húsnæði að Tangarhöfða 8 - 12, gegnt Húsgagnahöllinni. Þjónusta verður öll aðgengilegri og þægilegri fyrir viðskiptavini, sýningaraðstaða batnar og plássið eykst. Í nýja húsnæðinu verður öll sala á nýjum bílum, Porsche, Chevrolet og SangYong, ásamt hluta annarar þjónustu fyrirtækisins. Opið verður frá kl. 12 til 16 í dag og á morgun í framtíðarhúsnæðinu að Tangarhöfða 8. Þar verða, auk nýju línunnar frá Chevrolet, sýndir bæði keppnisbílar og fornbílar frá Chevrolet. Á staðnum verður einnig litaleikur fyrir börn og ýmislegt fleira til skemmtunar.