Konur búa til lampa

"Mig hefur lengi dreymt um að halda námskeið af þessu tagi og ákvað að láta verða af því núna," segir Þuríður Steinþórsdóttir en hún býður nú konum að koma á námskeið í lampagerð. Þuríður rak um árabil Forn-ný járngalleríið í Garðabæ en hefur nú flutt sig um set og býr á Laugarvatni. Þar rekur hún Galleríið þar sem hún selur eigin lampa, kertastjaka og ljósakrónur auk valdra muna eftir aðra listamenn. Lampanámskeiðið er hugsað fyrir smærri kvennahópa, sex til átta í hóp er hæfilegt. "Ég er bæði með þriggja kvölda námskeið og svo helgarnámskeið en þá gista konurnar gjarna og gera sér glaðan dag í leiðinni. Það var ótrúlega gaman á fyrsta námskeiðinu en þá gerðu konurnar allt sjálfar; þær pússuðu járnið, rafsuðu, lökkuðu og gengu frá rafmagninu. Svo bjuggu þær til skermana. Engir tveir lampar eru eins og hægt að velja um ólík form og liti. Þær voru alsælar með lampana sína þegar þær héldu heim á leið," segir Þuríður. Þuríður hefur verið búsett á Laugarvatni í um þrjú ár. Hún segir það forréttindi að búa á stað sem Laugarvatni. "Náttúrufegurðin er einstök hér um slóðir og samfélagið alveg yndislegt. Svo er auðvitað stutt í bæinn sem er kostur," segir Þuríður Steinþórsdóttir.