Nám til að styrkja stöðu öryrkja

Hringsjá er sjálfstæð stofnun, rekin af ÖBÍ með þjónustusamningum við félagsmálaráðuneytið og Tryggingastofnun. Í Hringsjá er veitt endurhæfing til náms og starfa en námið er ætlað einstaklingum eldri en 18 ára, sem vegna sjúkdóma, slysa eða annarra áfalla þurfa að endurmeta og styrkja stöðu sína. Í Hringsjá eru hverju sinni um 45 nemendur í fullu námi og námskeiðshópar að auki. "Við erum að kenna öll almenn fög eins og tölvunotkun, bókfærslu, stærðfræði, íslensku, ensku, samfélagsfræði, tjáningu, myndlist og námstækni, svo eitthvað sé nefnt," segir Guðrún Hannesdóttir, forstöðumaður Hringsjár. "Við veitum líka náms- og starfsráðgjöf og kennum gerð starfsumsókna. Þá þjálfum við fólk fyrir atvinnuviðtöl og vinnum með sjálfsstyrkingu nemenda, sem oft er ekki vanþörf á þar sem þeir hafa flestir verið án atvinnu í nokkurn tíma. Þá er hvatningin naðuðsynleg, eða svo vitnað sé beint í einn nemendanna:. "Ég tel námið í Hringsjá hafa hjálpað mér mikið og það er með mig eins og flesta aðra að þetta var ekki aðeins náms- og starfsendurhæfing heldur líka félagsleg endurhæfing." Næst verða nemendur útskrifaðir 18. maí en fullt nám er þrjár annir. Námskeiðin standa hins vegar fram að sumarleyfi 20. júní. Umsóknarfrestur fyrir haustönn er til 15. maí, en inntaka í fullt nám fer fram tvisvar á ári. Inntaka á námskeiðin stendur allt skólaárið.