Strákarnir snúa sig úr hálsliðnum

"Þetta er smábíll af gerðinni Smart Roadster 2004, framleiddur af Benz," segir Hildur Dís Kristjánsdóttir nemi, sem í agnablikinu ekur um á afar óvenjulegum en flottum sportbíl. "Benz byrjaði að framleiða þessa bíla árið 2003 og þeir hafa slegið í gegn í Evrópu og eru að koma sterkir inn í Bandaríkjunum. Pabbi keypti bílinn af því að hann er bæði kraftmikill og sparneytinn, eyðir ekki nema fjórum á hundraði. Þessi er 81 hestafl en þeir eru ýmist framleiddir 61 eða 81 hestafl. Það er ótrúlega gaman að keyra þennan bíl, hann er svo lítill og léttur og rosalega fljótur upp. Svo eyðileggur ekki að fólk snýr sig næstum úr hálsliðnum þegar maður er á ferðinni, ekki síst strákarnir. Er þetta þá "pick-up" bíll? "Ég og vinkona mín vorum á honum í gær og vöktum óskipta athygli. Ef maður gengur ekki út á svona bíl gerir maður það aldrei," segir Hildur og skellihlær. "Pabbi ætlar samt að selja bílinn svo það er kannski jafn gott fyrir mig að nota tímann," segir hún og hlær enn meira. Smartinn er jafn flottur að innan og utan og er hvorttveggja beinskiptur og sjálfskiptur. "Svo er hann að sjálfsögðu leðurklæddur með góðum græjum. Þetta er bara skemmtilegasti bíll sem ég hef keyrt," segir Hildur.