Mutu að ná fyrri styrk

Rúmenski markaskorarinn Adrian Mutu er óðum að koma til baka eftir sjö mánaða keppnisbann sem hann fékk vegna eiturlyfjaneyslu þegar hann lék með Chelsea og er farinn að skora grimmt fyrir landslið Rúmeníu. "Ég held að slæmu tímarnir séu að baki og ég get ekki sagt annað en að mér líður vel. Ég fann mig 100% vel í landsleikjunum á dögunum og fagna því að hafa unnið sigur á ósiðum mínum. Ég er ekki "vondi strákurinn" lengur og horfi nú aðeins fram á við," sagði Mutu, sem leikur með Juventus á Ítalíu.