Fasteignaverðið hæst í Lundúnum

Íbúðarhúsnæði í dýrari hverfum Lundúna í Bretlandi er það dýrasta í heimi. Þetta er í fyrsta sinn sem Lundúnir komast upp á þennan stall en New York í Bandaríkjunum hefur fram til þessa skartað dýrasta íbúðaverðinu. Veiking bandaríkjadals gagnvart breska pundinu á síðastliðnum þremur árum á stóran hlut að máli. Verð á dýrum fasteignum í fínni hverfum Lundúna á borð við Chelseahverfið og Notting Hill kostar að meðaltali um eina milljón punda eða tæpar 132 milljónir íslenskra króna. Víst þykir að fermetraverðið er fjarri því sem hér þekkist en fermetrinn í flottari hverfum Lundúna nemur rúmri einni milljón króna. Sambærilegar fasteignir við Madisontorg og Central Park í New York kosta öllu minna. Í könnun fasteigna- og fjárfestingarfélagsins CB Richard Ellis Hamptons International á fasteignaverðinu í Bretlandi kemur fram að um 40 prósent fasteignakaupenda eru af erlendu bergi brotnir. Fasteignaverð hefur hækkað talsvert í Bretlandi líkt og annars staðar í Evrópu en íbúðaverð í miðborg Lundúna hefur hækkað um allt að 21 prósent það sem af er ári og eru líkur á frekari hækkunum. Fasteignir í stórborgum Asíu eru í næstu sætum á eftir Lundúnum og New York. Tókýó er í þriðja sæti, Hong Kong í því fjórða en Singapúr í því fimmta. - jab