Flestir vilja sjá Saviola taka sæti Eiðs

Ratomir Antic, fyrrverandi knattspyrnustjóri Barcelona, segir að Eiður Smári Guðjohnsen sé ekki að spila vel fyrir félagið og að flestir myndu frekar vilja sjá Javier Saviola í fremstu víglínu liðsins.

"Gudjohnsen er ekki að spila vel. Flestir vilja frekar sjá Saviola," segir Antic í viðtali við BBC en þess má geta að viðtalið er tekið í tilefni af meintri krísu sem Barcelona á að vera í eftir tvö töp á síðustu vikum. Antic, greinilega bitur út í sína fyrrum vinnuveitendur, er þar fenginn til að gagnrýna allt sem hægt er að gagnrýna.

Antic segir að Barcelona sakni Samuel Eto´o sárlega í sókninni en hann hefur skorað 68 mörk í 101 leik fyrir liðið. Eto´o er meiddur og verður frá til áramóta.

"Ronaldinho hefur fundið sérstaklega fyrir fjarveru Eto´o og það er meiri áhersla lögð á að stöðva hann. En ef liðinu gengi illa með Eto´o heilan myndi Rijkaard setja Ronaldinho fremst og Eto´o á kantinn. Það hefur hins vegar ekki gerst með Eið Smára," segir Antic og furðar sig á íhaldssemi hollenska þjálfarans.