Liverpool staðfestir viðræður

Rick Parry, stjórnarformaður Liverpool, hefur staðfest að félagið eigi í viðræðum við Dubai International Capital fyrirtækið um mögulega yfirtöku þess á enska félaginu. Parry segir í yfirlýsingu sem send var út nú síðdegis að nýir eigendur komi með mikla möguleika inn í félagið.

“DIC er fjárfestir sem býr yfir miklum aðföngum og hugsjón sem fer vel saman við þá sem við viljum að ríki hjá þessu félagi. Þeir skilja út á hvað Liverpool gengur og bera virðingu fyrir arfleifð félagsins,” segir í yfirlýsingu Parry.

“Auk þess eru fjárfestarnir hungraðir í góðan árangur. Markmiðið hjá Liverpool er og hefur alltaf verið að sigra, og við teljum að hinir nýju fjárfestar geti gefið félaginu aukna möguleika til þess.”