Vilja framhald

Viðræður eru hafnar á milli breska grínistans Sacha Baron Cohen og kvikmyndaframleiðandans 20th Century Fox um að gera framhald af gamanmyndinni vinsælu, Borat.

„Við viljum ólmir vinna aftur með Sacha og höfum rætt lítillega við hann um framhald. Samningaviðræðurnar eru samt of skammt á veg komnar til að hægt sé að ræða frekar um þær,“ sagði talsmaður 20th Century Fox.

Áður hafði Rupert Murdoch, yfirmaður News Corp sem á jafnframt 20th Century Fox, lýst því yfir að Sacha Baron væri þegar búinn að skrifa undir samning um að gera framhaldsmynd.

Borat, sem fjallar um samnefndan sjónvarpsmann frá Kasakstan, sló í gegn síðasta sumar og náði inn rúmum sautján milljörðum krónum í miðasölu víðs vegar um heiminn. Myndin er tilnefnd til Óskarsverðlauna fyrir besta handritið auk þess sem Sacha Baron vann Golden Globe verðlaunin fyrir frammistöðu sína sem Borat.