Fleiri sjóræningjamyndir á dagskrá

Jerry Bruckheimer hefur ekki útilokað að kvikmyndahúsagestir fái meira af sjóræningjunum á Karíbahafinu. Þriðja myndin um Jack Sparrow og félaga verður frumsýnd í lok þessa mánaðar en þær hafa allar rakað inn peningum. Bruckheimer segir að þrátt fyrir að næsta mynd verði lokakaflinn um ævintýri Sparrows útilokar hann ekki að búnar verði til svokallaðar „spin-off“ myndir um aðrar persónur myndarinnar.

„Nú er þessum kafla lokið en þar með er ekki sagt að uppsprettan sé þurrausin,“ sagði Bruckheimer í samtali við ástralska blaðið The Herald Sun.

Geoffrey Rush tekur undir orð Bruckheimers og telur jafnvel ekki nauðsynlegt að Johnny Depp verði með. „Auðvitað eiga þeir eftir að velta þessu fyrir sér en Johnny gæti bara sagt: Jack, hann er búið spil,“ sagði Rush. „Honum gæti líka alveg eins snúist hugur og spurt: Ef þið þrefaldið launin mín skal ég gera þetta.“