Bourne kemst nær

Minnislausi njósnarinn Jason Bourne snýr aftur í þriðju myndinni en hún var frumsýnd í gær. Að þessu sinni virðist eitthvað vera farið að rofa til hjá honum því í síðustu tveimur myndum hefur Bourne fengið einhver svör um hvaðan hann er og hver hann var en þetta hefur ekki reynst honum fullnægjandi.

Og því ræðst hann í þriðja sinn að rótum sínum og nú situr Bourne í bílstjórasætinu. Leikstjóri Bourne Ultimatum er hinn virti Paul Greengrass en fjöldi stórleikara leggur Matt Damon lið sem bregður sér í líki Bourne í þriðja sinn. Meðal þeirra eru David Strathairn, Joan Allen, Scott Glenn og Albert Finney.

Jason Bourne er hugarfóstur rithöfundarins Robert Ludlum sem á sér dyggan aðdáendahóp hér á landi. Þrátt fyrir að hafa verið líkt við sjálfan James Bond eru hlutskipti þeirra tveggja ákaflega ólík. Bourne berst með berum höndum og hefðbundnum skotvopnum á meðan Bond fær oft aðstoð frá heldur ólíklegum og óraunverulegum hjálpartækjum. Reyndar lét Matt Damon hafa eftir sér að James Bond væri ekki lengur konungur leyniþjónustumannanna heldur hefði Bourne tekið við af honum.

Kvikmyndirnar þrjár um Bourne hafa skilað háum fjárhæðum í kassann fyrir framleiðendur myndanna og því verður erfitt að ímynda sér að fjórða myndin verði ekki að veruleika. DVD-útgáfan af Bourne Supremacy seldist til að mynda í tuttugu milljónum eintaka í Bandaríkjunum og halaði inn 500 milljónum dollara í aðsókn á heimsvísu sem samsvarar 32 milljörðum í kassann. Bourne Ultimatum hefur þegar slegið í gegn vestanhafs og því skyldi ekki útiloka að hún slá forverum sínum við í gróða.