Nadal byrjar árið á sigri

Spænski tennisleikarinn Rafael Nadal vann öruggan sigur á Rainer Schuettler á opna Chennai mótinu á Indlandi í dag 6-4 og 6-2, þrátt fyrir að vera nokkuð ryðgaður í byrjun. Nadal keppir einnig í tvíliðaleik á þessu fyrsta móti ársins og mætir heimamanninum Karan Rastogi í næstu umferð.

"Það var gott að byrja árið á sigri og ég vil ná mér 100% á strik sem fyrst. Ég þarf líklega nokkra leiki til að ná mér á fullt, en það var sætt að ná að sigra Rainer sem ég veit að getur verið mjög hættulegur andstæðingur," sagði sá spænski, sem er sem fyrr í öðru sæti heimslistans á eftir hinum magnaða Roger Federer.