Samdráttur hjá bandarískum bílaframleiðendum

Sala á nýjum bílum dróst nokkuð saman á milli ára hjá bílaframleiðendunum General Motors (GM), Ford og DaimlerChrysler á síðasta ári. Samdrátturinn var mestur hjá GM eða 8,7 prósent. Á sama tíma jókst sala á nýjum bílum um 12 prósent hjá Toyota í Bandaríkjunum. Fyrirtækið hefur verið á miklum hraðbyr og stefnir í að það taki fram úr GM á árinu sem stærsti bílaframleiðandi í heimi.

Samkvæmt bandarískum fjölmiðlum vestanhafs seldi GM 4,1 milljón bíla í Bandaríkjunum á síðasta ári sem jafngildir 8,7 prósenta samdrætti. Helsta ástæðan er minni sala á pallbílum og sportjeppum. Samdrátturinn í desember nam hins vegar 13 prósentum samanborið við árið á undan.

Sala á nýjum bílum dróst saman um 7,9 prósent hjá Ford, sem seldi 2,9 milljónir bíla á öllu síðasta ári. Í desember dróst salan hins vegar um 12,8 prósent. Þar af nam samdrátturinn 9,9 prósent í sölu á nýjum fólksbílum en 14 prósentum í sölu jeppa. Sala jókst einungis á bílum af gerðinni Land Rover á meðan sala á Jaguar-bílum dróst saman um 32 prósent. Greinendur spá því að þetta ár verði eitt af erfiðari árum Ford, sem fagnar 104 ára afmæli.

Þá dróst sala á bílum saman um 5 prósent á árinu hjá DaimlerChrysler. Helsta ástæðan fyrir samdrættinum er 11 prósentum minni sala á bílum af gerðinni Mercedes-Benz.

Á sama tíma og bandarískir bílaframleiðendur seldu minna og taprekstur þeirra jókst var söluaukning hjá japanska bílaframleiðandanum Toyota í Bandaríkjunum. Fyrirtækið seldi 2,54 milljónir bíla vestanhafs á síðasta ári sem er 12 prósenta aukning á milli ára. Þetta er sama aukning og í desembermánuði. Mest seldi bíll fyrirtækisins vestra var Toyota Camry en sala á bílum af þessari gerð jókst um 3,9 prósent á milli ára en sala á RAV4 jeppum jókst um 13,5 prósent.

Helsta ástæðan fyrir samdrætti bandaríska bílaframleiðenda en aukningar hjá Toyota eru verðhækkanir á eldsneyti sem varð til þess að kaupendur nýrra bíla snéru baki við stórum sportjeppum sem eyða miklu og keyptu japanska bíla í meiri mæli en áður enda þykja þeir sparneytnari.