Juventus býður Saviola samning

Juventus hefur boðið argentínska sóknarmanninnum Javier Saviola fimm ára samning en núverandi samningur Saviola við Barcelona rennur út í sumar. Saviola stendur frammi fyrir erfiðu vali þar sem hann hefur átt fast sæti í liði Spánar- og Evrópumeistaranna að undanförnu.

Forráðamenn Barcelona eru sagðir hafa mikinn áhuga á að endurnýja samninginn við Saviola í ljósi góðrar frammistöðu hans á síðustu vikum en Argentínumaðurinn hefur að sama skapi takmarkaðan áhuga á að vera varaskeifa fyrir Samuel Eto´o.

Saviola sagðist fyrir skemmstu vilja vera áfram hjá Barcelona en talið er að samningstilboð Juve, sem er mjög gott, geti hugsanlega lokkað leikmanninn frá Katalóníu.