Skikkja Obi-Wan til sölu

Skikkjan sem leikarinn Sir Alec Guinness klæddist í hlutverki Obi-Wan Kenobi í fyrstu Star Wars myndinni fyrir þrjátíu árum verður boðin upp af uppboðshúsinu Bonhams í London á næstu dögum.

Meðal annara muna á uppboðinu verða kvöldjakki sem Sean Connery klæddist í hlutverki James Bond í myndinni Þrumufleygur og búningar úr myndunum um Harry Potter.

Alec Guinness er einn ástsælasti leikari Breta frá liðinni öld en hann lést árið 2000. Hann er síður en svo sá eini sem klæðst hefur skikkjunni frægu, en hún var á flakki innan kvikmyndaiðnaðarins áratugum saman og var meðal annars notuð í kvikmyndinni The Mummy árið 1999. Hún fannst svo aftur í vörutalningu árið 2005 og verður nú loks sýndur aftur sá heiður sem hún og Sir Alec eiga skilinn.