Leaney í forystu á Heritage mótinu

Nú stendur yfir keppni á lokahringnum á Verizon Heritage PGA-mótinu á Harbour Town vellinum í Suður-Karólínu. Keppni var frestað í gær vegna hvassviðris. Ástralinn Stephen Leaney er með forystu þegar þetta er skrifað, á samtals 15 höggum undir pari, en þeir sem voru í forystu fyrir lokadaginn eru rétt hálfnaðir með hringinn og því staðan óviss.

Leaney byrjaði hringinn ótrúlega vel. Hann fékk par á 1. holu, en síðan kom örn á 2. holu og fjorir fuglar í röð og var hann þá á 6 höggum undir pari eftir 6 holur. Hann lék fyrri níu á 30 höggum og er samtals á 15 höggum undir pari þegar 9 holur eru eftir.

Jerry Kelly var með eins höggs forystu fyrir lokahringinn á samtals 13 höggum undir pari og var einu höggi á undan Ernie Els og Kevin Na. Þeir leika saman í holli í dag og hafa lokið við 7 holur þegar þetta er skrifað. Kelly lék þær á einu höggi undir pari og er því samtals á 14 höggum undir pari, og Na lék þær á 2 höggum undir pari og er því einnig á 14 höggum undir pari. Ernie Els er á parinu í dag og er því tveimur höggum á eftir Na og Kelly, sem fór holu í höggi á laugardaginn.

Frétt af Kylfingur.is