Dregur úr viðskiptahalla Bandaríkjanna

Viðskiptahallinn í Bandaríkjunum nam 59,2 milljörðum bandaríkjadala, jafnvirði 3.849 milljörðum íslenskra króna, í júlí. Þetta er 0,3 prósentustiga minni halli en í mánuðinum á undan, samkvæmt nýbirtum tölum bandaríska viðskiptaráðuneytisins. Ben Bernanke, seðlabankastjóri landsins, segir ríkisstjórnir heimsins verða að leggjast á eitt og draga úr viðskiptahalla landanna.

Viðskiptahallinn vestanhafs nú er litlu betri en greinendur höfðu gert ráð fyrir. Miklu munar um aukinn útflutning á matvöru, bílum og öðrum varningi í Bandaríkjunum. Mikil aukning í innflutningi á vörum frá Kína vegur hins vegar á móti.

Ben Bernanke, seðlabankastjóri, sagði í ávarpi sínu í dag, að Bandaríkin verði að vinna að því með öðrum þjóðum að draga úr viðskiptahallanum. Einungis þannig muni stöðugleiki nást á fjármálamarkaði, að sögn Bernankes í ræðu hans í Berlín. Þar vísaði hann meðal annars til mikils innflutnings frá Kína til Bandaríkjanna. Það hefur valdið því að viðskiptahalli hefur haldist nokkuð viðvarandi vestanhafs á meðan sjóðir Kínverja fyllast af dölum. Stjórnvöld í Bandaríkjunum hafa margsinnis reynt að draga úr hallanum, meðal annars með því að fá Kínverja til að sleppa höndinni af gengisstýringu kínverska júansins, að sögn Associated Press.