Evrópskir markaðir á uppleið

Gengi hlutabréfa hækkaði nokkuð á hlutabréfamörkuðum í Evrópu í dag eftir lækkun upp á síðkastið. Fjármálamarkaðir í Bandaríkjunum eru hins vegar lokaðir í dag vegna Þakkargjörðarhátíðarinnar. Gengi dalsins dalaði frekar í dag gagnvart evru en fjárfestar telja líkur á að bandaríski seðlabankinn muni lækka stýrivexti frekar fyrir árslok og koma þannig í veg fyrir að þrengingar á fasteignalánamarkaði setji frekara skarð í þarlent efnahagslíf.

Gengi bréfa í lyfja-, orku- og fjarskiptafyrirtækjum hefur hækkað mest það sem af er dags enda virðist sem fjárfestar hafi leitað þar skjóls eftir dapurt gengi banka og fjármálafyrirtækja upp á síðkastið, að því er fréttaveita Bloomberg greinir frá.

Gengi hlutabréfavísitalna á Norðurlöndunum hefur á sama tíma sveiflast nokkuð í dag og munar talsverðu á aðalvísitölunni í Danmörku, sem hefur verið á uppleið, og hinni sænsku, sem hefur lækkað um tæp 0,40 prósent.

Til samanburðar hefur Úrvalsvísitalan í Kauphöllinni lækkað um 0,71 prósent í dag. Vísitalan stendur nú í 6.735 stigum og hefur ekki verið lægri síðan um miðjan janúar.