Sýrlendingar styðja Rússa í Georgíu

Forseti Sýrlands sagðist styðja hernaðaraðgerðir Rússa gegn Georgíu, á fundi með fréttamönnum í dag.

Bashar al-Assad er í vopnakaupaleiðangri í Rússlandi og átti meðal annars fund með Dmitry Medvedev, forseta Rússlands.

Að honum loknum sagði Assad á fundi með fréttamönnum; "Ég vil lýsa stuðningi við afstöðu Rússlands í Abkasíu og Suður-Ossetíu. Ég er andvígur því að sverta málstað Rússa."

Sýrlendingar vilja kaupa bæði loftvarnaeldflaugar og herþotur af Rússum. Aðeins eitt annað ríki hefur lýst stuðningi við aðgerðir Rússa, það er Hvíta Rússland.