Seðlabankarnir eru kjölfestan

Jean-Claude Trichet, bankastjóri evrópska seðlabankans, segir fjármálamarkaði víða um heim ganga í þessar mundir í gegnum harkalega leiðréttingu. Hann segir hræringarnar undanfarið minna fólk á að efnahagsástand í einu landi geti haft áhrif í öðru.

Trichet fundaði í dag með efnahags- og fjárlaganefnd Evrópusambandsins en þar var lausafjárkreppa fjármálafyrirtækja og fall á hlutabréfamörkuðum umræðuefnið, að því er Thomson Financial-fréttaveitan hermir.

Trichet sagði ennfremur, að það væri hlutverk seðlabanka heimsins að halda fast í verðbólgumarkmið sín og koma í veg fyrir að verðbólga fari úr böndunum. Ekki mætti missa sjónar á því: „Seðlabankar eiga ætíð, ekki síst á erfiðum tímum, að vera kjölfestan og koma í veg fyrir að óróleikinn verði meiri en hann er," sagði hann.

Bandaríski seðlabankinn lækkaði stýri- og daglánavexti óvænt um 75 punkta í gær til að sporna gegn miklu falli á hlutabréfamörkuðum og verjast efnahagskreppu þar í landi. Vangaveltur voru um það í evrópskum fjölmiðlum í dag, hvort Trichet grípi til sömu ráða í dag eða síðar í vikunni.