Vilja breyta 3300 milljarða króna skuld í hlutafé

Meirihluti hluthafa í General Motors mun styðja samkomulag sem felur í sér að 27 milljarða dala, eða 3300 milljarða íslenskra króna, skuld fyrirtækisins verði breytt í hlutafé, segir talsmaður hluthafanna í samtali við AP fréttastofuna.

Þetta ætti að gera endurskipulagningu fyrirtækisins auðveldari eftir að hún fer í greiðslustöðvun, eins og gert er ráð fyrir að verði raunin á mánudaginn.

Í yfirlýsingu frá hópi stórra hluthafa sem birt var í dag kemur fram að eigendur 54% hlutafjár í GM séu samþykkir því að skipta ótryggum hlutabréfum sínum í 10% hlut í endurskipulögðu félagi ásamt kauprétt á stærri hlut síðar.

Í síðustu viku höfnuðu hluthafar svipuðu samkomulagi sem fól þó ekki í sér kauprétt. GM hefur fengið nærri 20 milljarða dala, eða 2400 milljarða króna, ríkisstyrk og búist er við að ríkið leggi 30 milljarða dala, eða 3600 milljarða króna, í viðbót inn í félagið eftir að það fer í greiðslustöðvun.