Sara Björk var dúndruð niður

Það er ekki ljóst hversu alvarleg meiðsli Söru Bjarkar Gunnarsdóttur eða Sifjar Atladóttur eru en þær þurftu báðar að yfirgefa völlinn í fyrri hálfleik í leik Íslands og Bandaríkjanna á Algarve-bikarnum í dag. Brotið á Söru Björk var sérstaklega gróft.

"Sara var bara dúndruð niður. Það var fólskulegt brot og hún fékk gult spjald fyrir það," lýsir landsliðsþjálfarinn Sigurður Ragnar Eyjólfsson og bætir við. "Hún fór í ökklann á henni á meðan Sara steig í fótinn og það var bara mjög gróft brot. Hún fór útaf á börum," sagði Sigurður Ragnar.

Það var Shannon Boxx sem braut á Söru og fékk að líta gult spjald fyrir. Boxx er 32 ára varnartengiliður sem var þarna að spila sinn 112 landsleik. Hún mun leika með Los Angeles Sol í nýju bandarísku deildinni.

Sara Björk átti frábæran leik á móti Noregi og var þarna enn á ný á undan andstæðingnum í boltann. "Þær komu báðar af fullum hraða í tæklinguna og Sara var aðeins á undan í boltann. Hún sparkaði boltanum frá og bandaríski leikmaðurinn lendir beint í ökklanum á Söru með takkann á undan sér og á fullri ferð. Þetta hefði getað farið ennþá verr," segir Sigurður Ragnar um atvikið.

Skömmu áður hafði Sigurður Ragnar einnig þurft að skipta útaf Sif Atladóttur sem kom inn í byrjunarliðið fyrir leikinn.

"Sif fór í eitthvað samstuð og lenti illa á hnénu. Hún þurfti líka að fara útaf. Þær verða eflaust frá í nokkra dagar en við sjáum betur stöðuna á morgun þegar við vitum betur hvernig þeim líður," sagði Sigurður Ragnar.