Frábær árangur hjá Björgvini

Björgvin Björgvinsson náði að koma sér í hóp 30 efstu keppenda í fyrri ferðinni í svigkeppni karla á HM í alpagreinum í Val d'Isere í Frakklandi.

Aðstæður voru gríðarlega erfiðar fyrir keppendur. Brautin var glerhörð og féllu margir keppendur úr leik. Ákveðið var að frysta brautina í gærkvöldi og hafa mótshaldarar verið harkalega gagnrýndir fyrir það.

Ekki nema 36 keppendur komust niður af þeim 75 sem hófu keppni. Féllu því 39 keppendur úr leik eða meirihluti þeirra sem hóf keppni.

Stefán Jón Sigurgeirsson náði þeim frábæra árangri að komast í gegnum undankeppni svigsins í gær en hann féll úr leik eins og svo margir aðrir.

Björgvin náði hins vegar að komast niður brautina. Hann kom í mark á 52,27 sekúndum. Þó svo að hann hafi verið 4,78 sekúndum á eftir fremsta manni er það hreint frábær árangur miðað við að hann var með rásnúmer 52.

Hann varð í 27. sæti sem þýðir að hann verður fjórði í rásröðinni í síðari ferðinni. Miðað við hvernig fyrri ferðin þróaðist er Björgvin í kjöraðstöðu til að ná góðum tíma gera jafnvel atlögu að komast í hóp 20 efstu manna.

Manfred Pranger frá Austurríki náði besta tímanum í fyrri verðinni en hann kom í mark á 52,49 sekúndum. Svíinn Johan Brolenius var annar fjórum hundraðshlutum úr sekúndu á eftir Pranger.

Aðeins sex keppendur voru innan við sekúndu frá tíma Pranger en sá sem var í sjötta sæti, Benjamin Raich, var 1,51 sekúndu á eftir landa sínum Pranger.

Síðari ferðin hefst klukkan 12.30 og verður í beinni útsendingu á Eurosport.